A Consellería de Educación apoiará ante o Ministerio de Ciencia e Innovación a proposta da Fundación Pública Galega Rof Codina para o centro de investigación en medianos e grandes animais
O conselleiro defenderá este proxecto xa que podería converter o centro nun referente en investigación animal a nivel internacional
O orzamento da transformación do actual recinto é de preto de 3.400.000 euros.
Lugo 21 Xuño, 2011
O conselleiro de Educación e Ordenación Universitaria, Xesús Vázquez Abad, vén de visitar as instalacións que a Fundación Pública Galega Rof Codina ten no campus de Lugo, durante o percorrido no que estivo acompañado polo xerente, Luis Felipe de la Cruz Palomino, recordou que a Consellería apoiará ante o Ministerio de Ciencia e Innovación a proposta da Fundación para a creación dun futuro centro de Investigación en Medianos e Grandes Animais.
Cómpre destacar que o conselleiro sinalou a importancia deste proxecto para Lugo e para Galicia, de acordo coas necesidades da comunidade no relativo á investigación, e polo tanto está a apoiar o desenvolvemento do mesmo de cara ao Ministerio de Ciencia. Recibidas as propostas de infraestruturas por parte das universidades, a Consellería de Educación estableceu as prioridades estratéxicas para a Comunidade Autónoma, quedando seleccionado o proxecto solicitado pola Fundación Pública Galega Rof Codina.
